Россиядан поездда қайтаётган ўзбекистонликлардан чегарачилар учун пул йиғилиши бўйича тарқалган аудио юзасидан текширув бошланди

Ижтимоий тармоқларда 369-сонли «Новосибирск—Тошкент» йўналишида ҳаракатланаётган йўловчи поезди вагон кузатувчиси ва йўловчи ўртасидаги аудиоёзув тарқалди.

Унда Россияда ишлаб қайтаётган Ўзбекистон фуқароларидан «чегарадан бош оғриқсиз ўтказиб қўйиш» учун пул йиғилаётгани айтилган. Вагон кузатувчиси йиғиладиган 1000 рубль Қозоғистон ва Ўзбекистон чегарачиларига берилишини таъкидлаган.

«Ўзбекистон темир йўллари» матбуот хизматининг хабар беришича, воқеликни атрофлича ўрганиш юзасидан тезкор ишчи гуруҳ тузилди. Айни вақтда «Ўзтемирйўлйўловчи» компанияси бош директори бошчилигидаги ишчи гуруҳ дастлабки ўрганиш ишларини бошлаган.

Қайд этилишича, «Новосибирск—Тошкент» йўналишида ҳаракатланаётган ушбу йўловчи поезди 30 октябрь, чоршанба куни Тошкент Марказий вокзалига етиб келади.

https://t.me/joinchat/AAAAAD63OEHkQHOlfdglMg